ភ្នំពេញ៖ ជនបរទេសសរុបចំនួន ១ ០៣៨នាក់ ត្រូវបានបណ្តេញចេញពីកម្ពុជាដោយសារតែពួកគេបានរស់នៅ ធ្វើការនៅកម្ពុជាខុសច្បាប់ និងខ្លះទៀតបានប្រព្រឹត្តិល្មើសច្បាប់។

តួលេខនេះត្រូវបានបញ្ជាក់ឱ្យដឹងពីអគ្គនាយកដ្ឋានអន្តោប្រវេសន៍ នាយឧត្តមសេនីយ៍ គៀត ចន្ទថារិទ្ធ ក្នុងពិធីប្រកាសផ្ទេរភារកិច្ច និងតែងតាំងមុខតំណែងនាយនគរបាលថ្នាក់ឧត្តមសេនីយ៍ ក្រោមអធិបតីភាព រដ្ឋលេខាធិការ ក្រសួងមហាផ្ទៃ លោក សុខ ផល កាលពីថ្ងៃទី១៦ ខែសីហា ឆ្នាំ២០២៣។

នាយឧត្តមសេនីយ៍ គៀត ចន្ទថារិទ្ធ បានបញ្ជាក់ឱ្យដឹងថា កម្ពុជាបានបណ្តេញជនបរទេសចំនួន ១ ០៣៨នាក់មកពី ២៦សញ្ជាតិចេញពីកម្ពុជា ក្នុងនោះមានជនជាតិចិនចំនួន ៥៤៩នាក់ ឥណ្ឌូណេស៊ីចំនួន ១៦៩នាក់ វៀតណាមចំនួន ១២៩នាក់ ថៃចំនួន ២៦នាក់ ម៉ាឡេស៊ី ២៥នាក់ និងជនជាតិបរទេសផ្សេងៗទៀត។ ពួកគេត្រូវបានបណ្តេញចេញក៏ព្រោះតែបានរស់នៅកម្ពុជាដោយខុសច្បាប់ និងផ្សេងទៀតបានប្រព្រឹត្តិល្មើសច្បាប់ជាដើម។

បើតាមលោកអគ្គនាយកដ្ឋានអន្តោប្រវេសន៍ ក្នុង១ឆមាស ឆ្នាំ២០២៣ នេះ កម្ពុជាបានអនុញ្ញាតឱ្យជនបរទេសចំនួនជិត៣សែននាក់បន្តរស់នៅកម្ពុជា ខណៈការផ្តល់ទិដ្ឋាកាចេញជាង ២ពាន់នាក់ និងផ្តល់ជូនជនបរទេសមិនមែនជាអន្តោប្រវេសន៍ស្នាក់នៅបណ្តោះអាសន្ន រយៈពេលយូរជាង ២សែន ៨ម៉ឺននាក់។

លោកបន្ថែមថា ក្នុងរយៈពេល ៦ខែឆ្នាំ២០២៣នេះ មានជនបរទេសជិត ២៦ម៉ឺននាក់បានមកសុំប័ណ្ណធ្វើការងារនៅប្រទេសកម្ពុជា ខណៈការស្នើសុំនេះគឺមានការសហការគ្នាជាមួយក្រសួងការងារបណ្តុះបណ្តាលវិជ្ជាជីវៈ។

រដ្ឋលេខាធិការក្រសួងមហាផ្ទៃ លោក សុខ ផល បានជំរុញឱ្យនគរបាលអន្តោប្រវេសន៍ខិតខំកិច្ចការងាររបស់ខ្លួនឲ្យសកម្មបន្ថែមទៀត ក្នុងកិច្ចការត្រួតពិនិត្យជនអន្តោប្រវេសន៍ខុសច្បាប់ ដើម្បីសន្តិសុខជាតិ។ លោកបន្តថា កិច្ចការងារដែលនគរបាលអន្តោប្រវេសន៍បានធ្វើនាពេលកន្លងមក បានល្អប្រសើរ ប៉ុន្តែនៅមានភាពចន្លោះប្រហោងដែលត្រូវតែបំពេញ និងត្រូវទប់ស្កាត់ឲ្យបានផងដែរ៕